ضمیر کابلوف، نماینده خاص روسیه برای افغانستان، گفته است که تاجیکستان مخالف اشتراک حکومت سرپرست افغانستان در فعالیت‌های سازمان همکاری‌های شانگهای است.
کابلوف در گفتگو با خبرگزاری ریا نووستی گفته است که روسیه و اکثر کشورهای عضو سازمان همکاری‌های شانگهای با از سرگیری کار گروه تماس این سازمان و افغانستان موافق اند، اما مقامات تاجیکستانی در این مورد ملاحظاتی دارند.
او ابراز امیدواری کرده که تاجیکستان در مورد این موقف خود تجدید نظر کند.
یک مقام تاجیکستانی اما گفته که کابلوف موضع کشورش را در این رابطه به گونه نادرست ارایه کرده است.
احمد سید مراد زاده، هماهنگ کننده ملی تاجیکستان برای سازمان همکاری‌های شانگهای، افزوده است که کشورش مخالف از سرگیری فعالیت‌های گروه تماس سازمان همکاری‌های شانگهای و افغانستان نیست.
مرادزاده خاطر نشان کرده که افغانستان عضویت ناظر سازمان همکاری‌های شانگهای را در سال ۲۰۱۲ به دست آورده بود، در حالی که توافق‌نامه‌ها برای ایجاد گروه تماس با مقامات این کشور در سال‌های ۲۰۰۵ و ۲۰۱۸ امضا شد.
وی افزوده است که تاجیکستان در نشست وزرای خارجه سازمان همکاری‌های شانگهای پیشنهاد کرد که در این مرحله، یک گفتگوی تخصصی در باره مسایل افغانستان در فارمت سازمان همکاری‌های شانگهای راه اندازی شود.
