اخراج شماری از مهاجران افغان از تاجیکستان؛ کارشناسان نگران افزایش محدودیت‌ها هستند

خبرگزاری اسپوتنیک گزارش داده است که شماری از مهاجران افغان به دلیل نقض قوانین از تاجیکستان اخراج شده‌اند. کمیته امنیت ملی تاجیکستان گفته است که این افراد با وجود برخورداری از شرایط مناسب زندگی، کار و آموزش، قوانین این کشور را به‌گونه جدی نقض کرده بودند. مقام‌های تاجیکستان تأکید کرده‌اند که بیش از ده هزار خانواده افغان همچنان به‌گونه عادی در این کشور زندگی می‌کنند. فعالان حقوق مهاجران می‌گویند موضوع مهاجران نباید سیاسی شود و مسئولیت جرم باید فردی دانسته شود، نه جمعی. در همین حال، کارشناسان امور مهاجرت هشدار می‌دهند که افزایش محدودیت‌ها بر مهاجران افغان در کشورهای منطقه، نگرانی‌ها درباره آینده آنان را بیشتر کرده است.