د ایمل پسرلي نوی ناول «مفسد» په حقیقت کې د یوې جګړې ځپلې ټولنې انځور دی. کیسه په کابل کې د جنایي پېښو د تحقیق د یوه امر «صادق» کیسه ده چې کاري ژوند یې له یوې دوې لارې سره مخامخوي. یا به مفسد کېږي او یا به د فساد په تور تورنېږي. د کتاب پر پوښتۍ د ناول له منځه یوه برخه داسې راغلې: «په سیاست کې وفا نشته، په مفسدو خلکو کې رښتیا نشته، خو زه ولې او څرنګه مفسد وبلل شوم. شاید یوازینی بلل شوی مفسد یم چې فساد مې نه دی کړی، یا شاید زه غلط یم، قضاوت یې پر تاسو چې زه مفسد یم که د سکرو په کان ورپېښ شوم، له ټولو سره زه هم ککړ شوم. هسې دوړه وه که پوره سکاره وو چې خیرن یې کړم؟ دلته هغه ټوله کیسه کوم چې څرنګه تر لویې څارنوالۍ راغلم…»
مفسد ناول د افغانستان او په تېره د کابل د تېر شل کلن ژوند ښکلی داستاني انځور دی.
دا یو له هغو ګوته په شمار ناولونو څخه دی چې نوي څه پکې وینو. موضوع یې خورا ډېره په زړه پورې او جالبه ده. دا ناول د اوسنیو حالاتو مطابق لیکل شوی دی. هغه څېرې راته واضح کوي چې ډېر کسان ورباندې غولېدلي دي او ډېر غریب خلک د دوی د لاس آلې ګرځېدلي دي.
د ناول یو کرکټر غریب سړی دی، دی صادقانه چلېږي، خو هېچا ته ارزښت نه لري. نه یې څوک خبرې اوري او نه یې پوښتنو ته ځواب ورکوي. په داسې حال کې چې ده ته یوه مهمه دنده سپارل کیږي، څو ویې څاري. یوازې دومره ورته ویل کیږي چې هغه کوه کوم چې درته ویل کیږي.
دا ناول له هغه تکراري ناولونو څخه نه دی چې موضوع یې یوه وي او د لیکنې بڼه یې بدله.
لسګونه داسې ناولونه به مو لوستي وي چې اصلي کرکټر یې یا مین وي او یا به یې هم ځان وژلی وي، یا یې مینه بایللې وي، یا ځوانه نجلۍ سپینږيري ته واده شوې وي او یا په عمر پخه ښځه تنکي ځوان ته کوژدنه شوې وي.
زموږ د ډېرو لیکوالانو چې یوې موضوع ته ورپام شي، تر هغه یې نه پرېږدي چې څو یې د لوستونکو زړه نه وي ترې ور تور کړی.
لیکوال باید نوي څه ولولي، نوي څه زده کړي او نوي څه ولیکي.
په دې ناول کې نه میین ځان وژنه کړې، نه له خپلې میینې سره ځنګله ته تښتېدلی او نه د نجلۍ پلار خپله لور وژلې ده. دا ناول نه راته پکلي کې ګودر او منګی انځوروي چې شاعران او لیکوالان یې په لیکلو ستړي شول او نه د لوی برج پر سر شنې کوترې؛ بلکې داسې څېرې انځوروي چې خلک د دوی له لاسه له هوسایۍ او آرامۍ بې برخې دي. نه مو ناکي اوښکې له سترګو تویوي او نه مو له ژونده زړه توري کوي. د فاسدو سیاستوالو له رازونو پرده پورته کوي او د دوی بد شکله او خاینې څېرې چې عامه او غریب خلک یې د لوبې ښکار شوي، راښیي.
په دې ناول کې چې کوم څه راغلي دي، لوستل یې د هر چا لپاره ډېر این دي.
مینهوال کولای شي یاد ناول پر اکسوس سربېره د ښار له نورو لویو کتابپلورنځیو هم په مناسب قېمت تر لاسه کړي.
