چین له افغاني سرې میاشتې سره نغدي مرسته وکړه

په چین کې د سولې او پراختیا بنسټ له افغاني سرې میاشتې سره د نغدې مرستې سند لاسلیک کړ. په هغه مراسمو کې چې نن د چین په سفارت کې جوړ شوي و، په چین کې د سولې او پراختیا بنسټ سکرټر جنرال، د چین سفیر، د پلان او پالیسۍ په برخه کې د کډوالو او بېرته راستنېدونکو چارو وزارت مرستیال، د کابل د والي مرستیالې، د افغاني سرې میاشتې غړو او د بې ځایه شویو کورنیو مسوولینو ګډون کړی و. د افغاني سرې میاشتې د ریاست مرستیالې اغلې مبارز په بېلابېلو برخو کې د چین له دوامداره مرستو مننه وکړه او ژمنه یې وکړه چې د چین د سولې او پراختیا بنسټ مرسته شوې پیسې چې څه باندې یو لک او دېرش زره امریکایي ډالره دي په کابل ښار د دریو کمپونو هغه بې ځایه شو ته ورسوي او اړین توکي ورته واخلي چې کلونه کېږي د هېوا له نا امنه ولایتونو څخه را کډه شوي دي. نوموړې  په راتلونکې کې هم ددغه ډول نورو مرستو د دوام غوښتنه وکړه. یوه اونۍ مخکې هم د چین سره صلیب کمېټې له افغاني سرې میاشتې سره په بېلابېلو برخو کې د مرستې یو تړون لاسلیک کړ. ددې کمېټې رییس چن ژوا د سرې میاشتې له سرپرستې رییسې حسن بانو غضنفر سره په یوه ګډ خبري کنفرانس کې د خبرو پر مهال وویل، کمېټه به یې په افغانستان کې د وروستیو پېښو له زیانمنو سره د دوه سوه زره امریکایي ډالرو نغدې مرستې تر څنګ د فاطمې ګیلاني د زړه روغتون د تجهیز او د زړه سوري پر ناروغۍ د اخته ۴۰۰ ماشومانو د درملنې په برخه کې مرسته وکړي.